Gazeta e njohur greke Kathimerini ka kritikuar qeverinë e SHBA se sipas saj nuk ka njohur vendimin e qeverisë greke për tu zgjeruar në detin territorial deri në 12 milje.
Siç bën të ditur Kathimerini, “Departamenti i Shtetit i SHBA nuk është në gjendje të sigurojë një listë të plotë të shkeljeve të konfirmuara të hapësirës ajrore të Greqisë nga avionët luftarakë turq pas 1 janarit 2017 për shkak të mungesës së konsensusit për gjerësinë e hapësirës ajrore kombëtare greke”.
Gazeta greke i referohet një raporti të Kongresit amerikan sipas të cilit, Greqia pretendon një hapësirë ajrore që shtrihet deri në 10 milje detare dhe një det territorial deri në 6 milje detare.
“Sipas ligjit ndërkombëtar, hapësira ajrore e një vendi përkon me detin e tij territorial. Kështu, SHBA njeh një hapësirë ajrore deri në 6 milje detare në përputhje me detin territorial. Greqia dhe SHBA. nuk ndajnë një pikëpamje për shtrirjen e hapësirës ajrore të Greqisë. ”
Raporti shton se megjithëse Athina aktualisht pretendon deri në 6 milje detare territoriale në Egje, “Greqia dhe fqinjët e saj nuk kanë rënë dakord për caktimin e kufijve në ato zona ku të drejtat e tyre të ligjshme detare mbivendosen”.
“Mungesa e një përcaktimi të tillë do të thotë se nuk ka qartësi në shtrirjen e detit territorial të Greqisë dhe hapësirës ajrore përkatëse në këto zona duke bërë që çdo vlerësim i shkeljeve totale të mos jetë i mundshëm,” bën të ditur raporti i SHBA..
Raporti i Departamentit të Shtetit tha se Uashingtoni inkurajon Greqinë dhe Turqinë “për të zgjidhur çështjet e pazgjidhura të kufirit detar në mënyrë paqësore dhe në përputhje me ligjin ndërkombëtar”.