Në zyrat e Tiranës mund të flitet për “reforma territoriale”, për “më pak bashki” dhe për “efikasitet”, por në jug të Shqipërisë, një qytet me histori mijëravjeçare po ndien se po e fshijnë nga harta: Delvina.
Qeveria ka paralajmëruar një fazë të re të reformës territoriale, që mund të zhdukë disa bashki “të vogla” – ndër to, përflitet edhe Delvina. Por a është Delvina një bashki e vogël? Apo një simbol i madh që s’duhet prekur?
Delvina është më shumë se një emër në hartë. Është vendlindja e Sulejman Delvinës, kryeministrit të parë të Shqipërisë moderne në vitin 1920 – njeriu që firmosi aktet e Pavarësisë së plotë dhe që ngriti shtetin nga hiçi.
A ta kujton diçka kjo, zoti Kryeministër?
Por historia e Delvinës nuk ndalet te emrat e mëdhenj. Aty ndodhet Kalaja e Delvinës, një ndër mbetjet më të vjetra të qytetërimeve ilire e osmane, dhe kompleksi monumental i Xhermëhallës i vitit 1682. Ky qytet ka qenë dikur qendër administrative, tregtare e kulturore, shumë përpara se të shpikej koncepti “bashki efikase”.
Nëse sot del një vendim për ta “bashkuar” Delvinën me një bashki tjetër, pyetja e madhe është:
Si mund të bashkosh diçka që vetë ka qenë themeli i bashkimit të Shqipërisë?
Banorët janë të revoltuar. Në kafene, rrugë e rrjete sociale, pyetja është e njëjtë: “Si mund të fshihet Delvina me një firmë?”
Në fund, qyteti që solli një kryeministër po rrezikon të zhduket nga lista e bashkive… nga një tjetër kryeministër.
Historia duket se po luan një ironi të hidhur. Dhe Delvina po pret përgjigjen.
Nga redaksia e Çkemi News
Ne jemi lajmi që nuk fle kurrë – sepse e vërteta s’ka orar!
Për kryeministrin
“Delvina s’është për t’u fshirë me laps! Kryeministër, lexo pak histori!”
“Para se ta heqësh nga harta, mëso kush ka lindur në Delvinë!”
“Kryeministër, mos e ngatërro Delvinën me një fshat – ajo ka bërë histori!”
“Delvina s’është thjesht një bashki, është themeli i shtetit që ti drejton!”