Tiranë – Pirateria televizive po përbën një nga sfidat më të mëdha për industrinë mediatike dhe zhvillimin e shërbimeve të ligjshme të transmetimit. Sipas ekspertit të sigurisë kibernetike, Nedion Marku, ky fenomen po dëmton ndjeshëm ekonominë e sektorit dhe po nxit një kulturë të paligjshme të konsumimit të përmbajtjes.
“Pirateria televizive është bërë një burim i madh shqetësimi, veçanërisht në një kohë kur teknologjia po mundëson shpërndarjen e përmbajtjeve në mënyra të ndryshme dhe me shpejtësi të lartë,” tha Marku. “Kjo po ndikon drejtpërdrejt tek të ardhurat e industrisë dhe po rrezikon të ardhmen e prodhuesve të përmbajtjes, të cilët shpesh mbështeten në fitimet nga të drejtat e autorit dhe reklamat për të mbuluar kostot e tyre.”
Sipas Markut, shumë faqe pirate transmetojnë përmbajtje të njohura nga kanale televizive pa lejen përkatëse, duke ofruar programe dhe filma të njohur për një audiencë të gjerë në mënyrë të paligjshme. Ky fenomen ka pasoja jo vetëm për kompanitë mediatike, por edhe për sigurinë e përdoruesve. “Shumë prej këtyre platformave përdorin skema të dyshimta për të fituar nga reklamat ose për të mbledhur të dhëna të përdoruesve pa autorizim, çka i ekspozon përdoruesit ndaj rreziqeve të ndryshme kibernetike,” shtoi ai.
Marku sugjeron se lufta kundër piraterisë televizive kërkon një bashkëpunim të ngushtë midis autoriteteve ligjore dhe institucioneve të mbrojtjes së të drejtave të autorit, për të përmirësuar mekanizmat e mbikëqyrjes dhe për të zbatuar masa më të forta ligjore.
“Është jetike që të ketë më shumë ndërgjegjësim dhe mbrojtje për të drejtat e autorit në mënyrë që të sigurojmë që përmbajtjet e transmetuara janë të ligjshme dhe të sigurta për përdoruesit,” përfundoi eksperti i njohur.