Pista se Alma Arrazi dhe tre fëmijët e saj janë hedhur nga ura e re e Bunës duke i dhënë fund jetës për momentin bie poshtë për policinë dhe prokurorinë e Shkodrës sepse dyshohet se vendi i vetëvrasjes është poshtë urës dhe jo mbi urë.
Kjo pasi u gjet një kukull që dyshohet se përket njërës prej vajzave të Alma Arrazit, e cila mendohet se mbyti tre fëmijët e saj dhe u vetëvra në ujërat e lumit Buna. Kukulla u gjet në këmbët poshtë urës, në një vend me zhavor dhe pemë e shkurre. Kukulla është sekuestruar nga prokuroria dhe është çuar për t’i bërë ADN-në nëse ka apo jo lidhje me njërin prej tre fëmijëve të mbytur të Alma Arrazit.
Kukulla e gjetur në breg poshtë urës, bëri që forcat RENEA nga fshati Darragjat ku u gjet vajza 9 vjeçe të përqëndrojnë kërkimet e tyre në këtë vijë ujore të lumit. Vetëm pak metra më tutje, te pinarët u gjet trupi i pajetë i vajzës 8-vjeçare. Jo shumë larg saj, në një largësi prej afro 2-3 kilometër në afërsi të Oblikës në Anën e Malit u gjet edhe trupi i djalit 4 vjeçar dhe rreth 35 kilometër nga aty përballë fshatit Pentar në ujërat që i përkasin Malit të Zi u gjet edhe trupi i pajetë i Alma Arrazit.
Ndërkohë sot kanë dalë për herë të parë pamjet filmike të çasteve të fundit të Alma Arrazit dhe 3 fëmijëve të saj të mitur, përpara se të mbyteshin në lumin Buna./K.C/dritare.net