Disa dronë të paidentifikuar janë vërejtur mbi tre baza të Forcave Ajrore të Shteteve të Bashkuara (USAF) në Angli gjatë gjashtë ditëve të fundit. Lajmi është konfirmuar nga një zëdhënës i USAF të martën.
“Sisteme të vogla ajrore të paidentifikuara u vunë re pranë dhe mbi RAF Lakenheath, RAF Mildenhall dhe RAF Feltwell nga 20 deri në 26 nëntor,” tha zëdhënësi në një përgjigje për agjencinë Reuters. Këto baza, dy në Suffolk dhe një në Norfolk, janë marrë me qira nga USAF.
Një zëdhënës i Ministrisë së Mbrojtjes së Britanisë (MOD) theksoi se “kërcënimet merren seriozisht dhe masat mbrojtëse janë të forta”, duke shtuar se po mbështesin Forcat Ajrore Amerikane në përgjigjen ndaj këtij incidenti.
Sipas burimeve të PA Media, trupat britanike janë mobilizuar për të ndihmuar USAF të zbulojë se kush qëndron pas këtyre fluturimeve të dyshimta. Gazeta The Times raportoi se rreth 60 trupa ushtarake janë dislokuar për këtë qëllim.
Burime ushtarake britanike kanë ngritur shqetësime se dronët mund të jenë pjesë e një plani “të errët” dhe të qëllimshëm. Deri tani, as MOD dhe as USAF nuk kanë dhënë një koment mbi moblizimin e trupave, duke lënë incidentin të mbuluar nga misteri.
Ky rast ka shkaktuar një alarm të madh për sigurinë në bazat ushtarake, duke ngritur pikëpyetje mbi nivelin e mbrojtjes dhe rreziqet potenciale për sigurinë kombëtare në Angli.